TATA IBADAH MINGGU I ( Versi Bahasa Biak)

  

                          

                          SAMSON MINGGU BEPON

                                        ( Minggu I )

1. WOS RAK – RAK :
        “ Kuker snon – snon ro Kmaya, Rumgun ya, ma Rurbesren ya ” Amin.

2. WOS FARKAKWAI :
        “ Ibyekada saswarma babye, ro Allah Kma kobedi,
        ryamuma be mgo, ro Mansren Yesus Kristus “

3. DOUW SANANDIK MAZMUR/NY. ROH :

4. SASOSER MANSREN        (Jemaat Sores)
        Fadwer sasoser samfur, kawos iknampu radine :
        Waswar Yahwe Mansern bedi, ro snembri besiper,
        ma ro Rur bedi besiper, ma ro kar kara bena besiper.
        “ Ine sasoser bepon ma bebaya irya. Sasoser bebe suruya iba
        imnis sasoser beponya, ryok radine : “ Waswar min beja, 
        raris mob waswar manggundau raya “. 
        Sasoser ansuine sube knam ro Refo Yahudi ma syap ro Nabi – nabi  

        sya kam                                                                                                

                                                                                (Jemaat Skain Kaber)

5. KORUN KOSNESNA MA KOKARM SASAR KOBENA :
        “ Korun kosnesna ro barpon Mansren Yahwe, ma kokarm sasar kobena kuker 
        nap napes “ 
        Mansei beyobe syasar ba ido, bye angar manggundi, ma kakakuya isya faro iba. 
        Imbape mansei bebaryas sasar byenaido. Yahwe fyasnai saswar Byeja faroi, 
        isof byuk mafro barbor byena ma fyasren iro sasar bebor byena.

6. KOBENADI :
        “ Syeee, Mansren, nggoine snonggaku bebarbor Au kada wanapes ro 
        bondi bur Au, ngo-kenemro sasar yadori. Nggobesasar ro swaruser, 
        awawos, ma fararur inggobena. Nyaki sasar nane nfan fanfon isof nabor rape. 
        Nggofafko snar nggosambrab fa nggoyau sasar an naneba. Irya wasnef’r inggo 
        besya kwar.” A m i n 

7. DOUW SANANDIK MAZMUR/NY. ROH :

8. BARARYAS SASAR :
Naek ma srar mgo mnaf nabye ananun ro Yesus Kristus faro snonggaku 

        bekar’m sasar sena kuker nanp napes. Yesus ikofen : Mansei befrar yob 

        Ayaido, yapok yapam pum ibur Aya baberi

9. DOUW SANANDIK MAZMUR/NY. ROH :

10. KAKYAR KRISTEN :
Ro babe oser kuker Gereja Mansren, ro fafisu nakam ma ro mob nakam, 
kokar’m kakyar koben. Oser – oser kyar’m kakyar beja radine :
“ Yakyar faro Yahwe, Kma bepoik syadi, beyau Nanggi ma dunia. 
Yakyar faro Yesus Kristus, Sami manjos Byedi, Mansren kobedi, 
kuker sambrab Rur besren, Inggbor Maria fyadores ma dabni imboi 
ro fyor Pontius Pilatus ikif babe sasoser ya, spai Iro aprop, 
imar, sikram,I dadube mun soroka, ro ras bebekyor ikbokro fandu bemar sya, 
dek be Nanggi, kyainro bar raku Yahwe, Kma bena papoik ya ma nari raso 

        ryama wer, insa kyara asuser kawasa bekenem ma bemar sya. Yakyar Rur 

        besren ya, yakyar babe oser, isya fandu kawasa besren sya, yakyar mafro

        sasarna. Yakyar abiber faro kraf saprop ya. Yakyar kangkenem bemnaiba

         isof fyoro – fyoro. A m i n.     

11. DOUW SANANDIK MAZMUR/NY. ROH :

12. NADI BABEWASYA RO REFO :
Kowasya ro syap …. Isof ro dine wawasya kobedi
“  Aski faro mansei ma insei bemnaf Mansren wos ya, 
ma beyardu iro kanggenem byedi. Haleluya 3X

13. ANUN FARSARSER :
Kodisen ro Dou…. Fafisu kodisen, kobuk farsarser kobena faro Mansren fararur 

        byedi. Mansren iswar kawasa bebuk farsarser kuker snewar besiper.

14. NADI FARSARSER :
Kma inggobedi Mansren Nanggi, Nggofanam Au ro fafisu ine, kuker farsarser 

        inggobenane. Imnis nggosmai naro Au, rarirya kako nggower nggobuk ker mgun 

        faro Au, raris saswar Bena. Ibyekada Mansren be bokna, insa nafrur raryeun 

        fararur Beja ro fandu snonggaku, ma nun syom sandik faro Au kada. Amin     

15. FAYA REFO :

16. NADI SWARUSER / NADI BEBA :
Kma inggobedi ro Nanggi yaswa Nggofasren snon-snon Bedi, babe sasoser 

        Bedi ryamuma, fasnai marin Bedi ro Nanggi. Rarirya kako faro sup swan ine.
Buk be inggo ro ras ine, nanan bemawes, ma fasren inggoro sasar inggo bena.
Imnis nggokako nggofakman befrur sasar maro inggo kwar sya, wun inggobur 

        faraw rowes, imboi faspar inggobur  barbor na, snar Au so Bena babe 

        sasoser ya,papoikya, ma nasan bekain ro fioro isof fioro bis. Amin         

17. DOUW SANANDIK : MAZ / Ny ROH 

18. NADI PAPUPES :
Kosmai Bok Ro Mansren, Ma Kobur Be Rum Kobena Kuker Aski.
Saswar Ro Mansren Yesus Kristus, faka maman Yahwe Ma fanab nobek Ro 

        Rurbesren Ya, Kyonso Naek Ma Srar, 

        Randak Ro Kur Ine Isof Fyoro – Fyoro. Amin